Реклами на компанијата за мобилност „Болт“ периодов ги таргетираат граѓаните на Скопје, нудејќи им да возат и да заработуваат. Огласите на социјалните мрежи го отворија прашањето дали естонската компанија – конкурент на „Убер“, влегува на македонскиот пазар. Се чини дека Северна Македонија ќе биде првата земја во регионот на Западен Балкан во која „Болт“ ќе ги понуди своите услуги.
„Заработете дополнителни пари додека возите“, „Заработете дополнителни пари во 3 лесни чекори“, „0% провизија“ – вака стои во описите на рекламите што изминативе недели ги гледаат корисниците на Фејсбук и Инстаграм во земјава, а кои ги објавува компанијата за мобилност „Болт“. Преку ваквите огласи кои првпат се објавени на 25 септември, „Болт“ практично бара возачи кои би ги регрутирала за транспортните услуги што евентуално би ги понудила во Скопје.
Кликањето на огласите ги пренасочува корисниците кон официјалната страница на „Болт“ и тоа кон делот за регистрација на нови возачи. Таму, меѓу градовите каде корисниците може да се пријават за да возат, веќе е наведен и главниот град Скопје. Скопје во моментов е и единствениот град од целиот регион на Западен Балкан каде може да се регистрирате како возач, односно „Болт“ засега не оперира, ниту пак има најава за такво нешто во друга западнобалканска држава.
Компанијата не оперира ниту во Бугарија, а од земјите во регионот своите услуги ги нуди само во Грција, Хрватска и Словенија.
Мета.мк се обрати до „Болт“ со прашања за тоа дали компанијата навистина ќе почне да оперира во Скопје, но и кои услуги би ги нудела во македонскиот главен град.
Од компанијата не сакаа да коментираат, но, меѓу другото, рекоа дека ќе нè известат „штом ги започнеме операциите за возење во Македонија“.
„Нашиот тим за истражување и развој секогаш бара нови земји за проширување. За жал, во овој момент не можеме подетално да ги коментираме нашите деловни планови. Дефинитивно ќе ве известиме штом ќе ги почнеме нашите операции за возење во Македонија“, велат од Болт за Мета.мк.
Станува збор за естонска компанија за мобилност која нуди различни услуги за транспорт и испорака, меѓу кои и возење во такси или приватни автомобили, изнајмување на автомобили, електрични скутери и велосипеди, па дури и достава на храна и намирници.
Најпозната е по тоа што корисниците може да се пријават како возачи со свој сопствен автомобил, со што би станале достапни за изнајмување од корисниците кои имаат потреба од превоз.
Доколку пристигне на македонскиот пазар, компанијата ќе им стане конкурент на такси превозниците во Скопје. Ако се направи површна споредба на цените на такси превозот во градовите каде оперира компанијата, може да се види дека возењата со „Болт“ во повеќето градови се поевтини од оние со стандардните такси превозници.
„Болт“ во моментов функционира во повеќе од 500 градови низ 45 земји во Европа, Африка, Западна Азија и Латинска Америка.
