Извршниот комитет на ВМРО-ДПМНЕ го потврдил изборот на стоматологот Дејан Ивановски за нов претседател на партискиот општински комитет во Штип, информира Иво Котевски од Центарот за комуникации на партијата.
Ивановски е релативно ново и непозното име во штипските политички кругови. За дел од партиските членови е изненадување бидејќи не се сеќаваат дека името на Ивановски било во повеќе анкети што ги спровела партијата при изборот за координатор.
Имено, близу две години, со неколку распишани конкурси, траеше изборот на прв човек на разгранокот на владејачката партија во Штип, откако досегашниот, Никола Мицевски, влезе во парламентот. Во меѓувреме, Мицевски ја вршеше функцијата в.д. координатор. Од партијата коментираат дека не е првпат највисокиот врв и лидерот Никола Груевски да излезат со избор на координатор чие име ниту еднаш не е споменато во партиските комбинаторики.
Новиот координатор Ивановски бил член на партијата од 1997 година, но поактивен во партијата е последните две-три години. Од партиските тела, бил член на комисијата за здравство во унијата на млади сили. Има приватна ординација во населбата Сењак. Интересно е дека на претстојните избори во април 2016 година, разграноците на двете најголеми партии, ВМРО-ДПМНЕ и СДСМ, во Штип ќе се „судрат“ раководени од стоматолог и од хирург.
