Самостојниот синдикат на новинари и на медиумски работници (ССНМ) најостро протестира поради третманот на новинарите и на медиумските работници од политичките елити, каков што беше покажан и вчера попладне пред Клубот на пратениците, кога претставниците на медиумите беа оставени со часови да чекаат надвор од објектот.
„Синдикатот сака да потсети дека таквиот однос, кој се повторува во континуитет, не е однос кон новинарите и кон медиумите, туку е однос кон јавноста генерално, со што политиката покажува колку ги цени сопствените граѓани и нивното право да бидат информирани. Цинизмот на политичките елити во нивниот потценувачки и понижувачки однос е дотолку поголем, бидејќи вчера требаше да се преговара за ДИК, но и за истите тие медиуми чии претставници беа оставени со часови на студ да ги чекаат резултатите од преговорите. ССНМ бара од сите политичари и институции во иднина на новинарските екипи да им овозможат елементарни услови за работа и потсетуваме дека силно ќе го креваме нашиот глас пред домашната и меѓународната јавност за начините на кои се третирани медиумските работници од политиката“, стои во соопштението на ССНМ.