ССНМ го осуди вечерашниот вандалски напад врз новинарската екипа на порталот „А1он“ за време на протестот „За заедничка Македонија“ и побара полицијата да ги пронајде напаѓачите.
„Синдикатот бара полицијата во најкраток можен рок да ги пронајде напаѓачите и да го расчисти инцидентот, бидејќи ова не е првпат да се претепуваат новинари и она што најмногу загрижува е што најчесто напаѓачите остануваат неказнети. Токму ваквиот однос кон новинарската професија, меѓу другото, придонесува Македонија секоја година дополнително да тоне на меѓународните листи за слобода на печатот и да гравитира поблиску до земји како Северна Кореја, отколку до современите демократии“, стои во соопштението.
Од Синдикатот истакнуваат дека инцидентот е резултат на неодговорните политичари и нивните приврзаници чиј говор на омраза преку медиумите и социјалните мрежи токму на ваков начин се сели на улиците.
„Со оглед дека протести се најавени и во наредните денови, ССНМ ги повикува членовите на иницијативата „За заедничка Македонија“ и нивните поддржувачи да направат сè што е во нивна моќ овој инцидент да не се повтори и да им овозможат на новинарите да си ја вршат работата без да стравуваат за својот живот“, стои во соопштението.
