„Средношколски пленум“ го осуди притисокот врз средношколката Илина Димовска од Велес, на која ѝ беше намалено поведението поради став искажан на „Фејсбук“ и побара укинување на изречената мерка. Од „Средношколски пленум“ велат дека училиштето на овој начин врши цензура и притисок врз средношколката.
„Управата на училиштето, со ваквиот чекор, дрско посегнува по слободата на уверувањето, совеста, мислата и јавното изразување на мислата, загарантирани со Устав, со што се врши класичен обид за цензура и за притисок, при што дополнително, на средношколката ѝ се оневозможува и правото на претставки и на жалби. Изразуваме јасна и недвосмислена поддршка на средношколката Илина Димовска од Велес, додека ваквиот чин на управата несомнено го вбројуваме во листата на неуспешни обиди за газење по слободната и по критичка мисла и амортизација на револтот од лошите реформи во образованието“, се вели во реакцијата на „Средношколски пленум“.
На средношколката Илина Димовска, ученичка во „Кочо Рацин“ во Велес, ѝ било намалено поведението затоа што на 16 номеври на „Фејсбук“ напишала критички став кон вработените во училиштето. Казната била донесена без да се завери записник, да се свика Советот и без одлуката да ја потпише родител.
„За статусот бев повикувана на разговори со директор и со служба кои се почувствувале многу навредени и изненадени и ги болеше тоа дека ја кажувам вистината за тоа што се случува во гимназијата. Разговорите беа писхичко малтретирање за мене поради начинот на кој ми се обраќаа и фактот дека тројца возрасни ѝ се нафрлија на ученичка од 16 години. Добив закана, или, подобро да речам, соопштение дека ќе бидам санкционирана поради фејсбук-статус. За да се изрече педагошка мерка, потребно е да се завери записник, да се свика совет, да се донесе одлука, одлуката да се достави до родител и да има потпис од родител. Еве, ќе ви кажам, ништо од тоа не се случи. Ниту јас, ниту мој родител се потпиша на записник, ниту беше доставена одлука до моите родители, ниту некој се потпиша на одлука“, напиша средношколката Димовска.
