Граѓаните му даваат поддршка на СДСМ да истрае во процесот што го отвори, за фер избори, на кои Македонија ќе добие влада избрана од народот, а не од непостоечки гласачи, влада признаена од сите, со полн легитимитет, рече генералниот секретар на СДСМ и министер за внатрешни работи, Оливер Спасовски, при посетата на жителите од Демир Хисар.
– СДСМ цврсто стои на ставот дека следните избори во Македонија мора да бидат слободни, фер и регуларни. За тоа се потребни прочистен избирачки список и медиуми што ќе имаат обврска да известуваат објективно – рече Спасовски.
При посетата на селата Единаковци, Суводол и Слепче, Спасовски на граѓаните им рече дека СДСМ ќе ги врати луѓето во државата, ќе ги задржи оние кои се тука и ќе обезбеди пристоен живот за сите.
– Погрешните и уништувачки политики на ВМРО-ДПМНЕ со кои се штитат бизнисите на „фамилијата“ на власт се причината за сите овие проблеми. Наместо да се грижат за граѓаните, тие се грижат за своите интереси. Повеќе од 5 милијарди евра се изнесени од Македонија во последните 10 години. Со овие пари може да се подобри општественото живеење. Оваа држава не е во сопственост на ВМРО-ДПМНЕ. Затоа парите ќе ги вратат. Иселувањето на младите излезе „најуспешна“ реформа на Груевски и на ВМРО-ДПМНЕ. Ние ќе си ги вратиме луѓето во државата. Ставаме крај на расипничката власт – рече Спасовски.
