Министерството за одбрана на САД потврди дека руски борбен авион „су-34“ го нарушил турскиот воздушен простор во петокот, се вели во соопштение на портпаролот на Пентагон.
– Може да потврдиме дека вчера уште еден руски борбен авион го повреди турскиот и воздушниот простор на НАТО – изјави портпаролот на Пентагон, Марк Рајт.
Вашингтон ги повика и Москва и Анкара да преземат мерки за да се спречи ескалација.
Вчера Турција тврдеше дека руски борбен авион „су-34“ го нарушил турскиот воздушен простор и поради тоа е повикан рускиот амбасадор во Анкара.
Како што беше наведено во соопштението на турското министерство за надворешни работи, пилотот на рускиот авион е предупреден на руски и на англиски јазик пред да влезе во воздушниот простор на Турција.
Руското министерство за одбрана ги демантираше тврдењата на Турција дека завчера рускиот воен авион го нарушил турскиот воздушен простор.
– Немало никакви нарушувања на воздушниот простор на Турција од авиони на руската авиогрупа во Сириската Арапска Република. Тврдењата на турската страна дека руски авион „су-34“ го нарушил воздушниот простор се чиста пропаганда. Уверен сум дека турските експерти по противвоздушна одбрана знаат дека радарите, кои вршат контрола на воздушниот простор, можат да ја фиксираат само височината, курсот и брзината на објектот во воздух. Ниту еден радар не е способен да го утврди типот и државната припадност на воздушниот објект, дали тој е на Русија или на коалицијата, предводена од САД – изјави портпаролот на Министерството, Игор Конашенков.
