Со еднодневен инклузивен танц-фестивал под мотото „Имам можности, имам избор“, денеска се одбележува Светскиот ден на лицата со Даунов синдром.
На танцовиот фестивал, кој е во организација на „Трисомија 21“ – Скопје, во соработка со танцовиот клуб „Денсерс јунајтед МК“, ќе учествуваат околу стотина изведувачи од Македонија со и без попреченост.
– Идејата е да се покаже дека е важно на лицата со Даунов синдром да им се даде избор и можност да се изразуваат, за развој на нивните способности и за целосно вклучување во општеството – велат организаторите.
Танцовиот фестивал точно напладне ќе се одржи во Театар „Комедија“, додека вечерва, во 20 часот, во „Концепт 37“ ќе се одржи „Танц-караоке“, настан на кој учесниците, покрај гласовните, ќе можат да го покажат и своите танцувачки способности.
Влезот и за двата настана е бесплатен.