Земјотрес со интензитет од шест степени според Рихтеровата скала го погоди малезискиот остров Борнео, во близина на местото Монт Кинабалуа, и предизвика оштетување на патиштата и на зградите, а има и повредени планинари.
Локалните власти јавуваат дека повредени се најмалку четири планинари, кои имаат скршеници и повреди на глава, предизвикани од камењата што се одрониле од гранитниот планински врв, висок 4.095 метри.
На планината има заробено 145 лица, а операцијата за спасување е во тек.
– Потресот беше толку силен што предизвика пукање на карпестиот врв познат како Магарешки уши – рече министерот за туризам на државата Сабах, Масиди Манјун, додавајќи дека планинарењето е запрено на неопределено време.
Американскиот институт за геологија наведе дека земјотресот настанал на длабочина од 10 километри, а епицентарот бил на 54 километри источно од Кота Кинабалуа.
Засега нема извештаи за поголеми штети или повредени во другите делови на Сабах.