Земјотрес со јачина од 3,1 степен во Албанија, почувствуван и во Дебар и околината

Според податоците со кои располага сеизмолошката опсерваторија при ПМФ, земјотресот бил почувствуван во југозападниот дел од Македонија – во Дебар и околината, со интензитет од три степени според Европската макросеизмичка скала

фото: принтскрин / Европско-медитерански сеизмолошки центар на „Х“

Сеизмолошката опсерваторија при Природно-математичкиот факултет во Скопје вчеравечер соопшти дека нејзината телеметриска сеизмолошка мрежа регистрирала земјотрес во Албанија. Земјотресот со магнитуда од 3,1 степен според Рихтеровата скала се случил во 23 часот и 37 минути, а епицентарот бил 128 километри југозападно од Скопје, во соседна Албанија.

Според податоците со кои располага опсерваторијата, земјотресот бил почувствуван во југозападниот дел од Македонија – во Дебар и околината, со интензитет од три степени според Европската макросеизмичка скала.

За земјотресот јави и Европско-медитеранскиот сеизмолошки центар, од каде информираа дека епицентарот на земјотресот бил 21 километар североисточно од албанскиот град Елбасан.

ПОВРЗАНИ НАПИСИПОВЕЌЕ ОД АВТОРОТ