Пунктот за промена на лични документи без закажување во Полициската станица „Пролет“ во Скопје ќе работи и утре и задутре, односно за време на целиот викенд, информираше Министерството за внатрешни работи (МВР).
Работното време оваа сабота и недела на пунктот е од 8 до 16 часот, а граѓаните кои сакаат да направат промена на личните документи таму, тоа можат да го направат без претходно закажување.
Претходно неделава, министерот за внатрешни работи Оливер Спасовски рече дека во новоотворениот пункт во ПС „Пролет“, процедурата за промена на личните документи во еден ден ќе може да ја поминат по околу 1.000 лица.
Овој пункт беше отворен со цел во определениот законски рок до 12 февруари 2024 година, граѓаните да ја направат промената на личните документи со Република Северна Македонија – задолжителна обврска којашто произлезе од Преспанскиот договор потпишан со Грција.
