Просечната нето-плата по вработен во земјава во јуни 2023 година изнесувала 36.527 денари и истата е за 14,6 отсто зголемена во споредба со идентичниот месец лани, соопшти денеска Државниот завод за статистика.
Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Градежништво (19,6 отсто), Информации и комуникации (17,9 отсто) и Образование (17,5 отсто).
Зголемување на просечната месечна исплатена нето-плата по вработен, во однос на претходниот месец, е забележано во секторите: Трговија на големо и трговија на мало; поправка на моторни возила и мотоцикли (6,3 отсто), Рударство и вадење на камен (5,7 отсто) и Објекти за сместување и сервисни дејности со храна (3,2 отсто).
Како и досега, највисоки месечни примања во Македонија имаат вработените во секторот Компјутерско програмирање, консултантски и сродни услуги, каде во јуни просечната нето-плата изнесувала 95.257 денари. Најниска нето-плата од 18.800 денари во јуни 2023 година е исплатена во секторот Заштитни и истражни дејности.