Просечната нето-плата по вработен во август 2023 година изнесувала 36.390 денари и истата е зголемена за 14,2 отсто во однос на август 2022 година, информираше денеска Државниот завод за статистика (ДЗС).
Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Административни и помошни услужни дејности (21,6 отсто), Образование (17,5 отсто) и Градежништво (16,5 отсто).
Зголемувањето на просечната месечна исплатена нето-плата по вработен, во однос на претходниот месец, е забележано во секторите: Рударство и вадење на камен (3,8 отсто), Административни и помошни услужни дејности (3,3 отсто) и Објекти за сместување и сервисни дејности со храна (2,3 отсто).
Највисока просечна нето-плата е регистрирана во секторот Компјутерско програмирање, консултантски и сродни дејности, која во август годинава се искачила на 92.464 денари. Наспроти ова, најниска плата во земјава е регистрирана во секторот Заштитни и истражни дејности, каде нето-платата во просек изнесувала 20.021 денари.
