Од денеска започнува вакцинацијата против сезонски грип, информира денеска претседателот на Комисијата за заразни болести, проф. д-р Александар Петличковски. Тој кажа дека процесот досега се одвива во најдобар ред.
„Ги следиме препораките од Светската здравствена организација (СЗО) за почеток на вакцинацијата во октомври. Би било убаво годинава да забележиме пораст на опфатот со што би се приближиле до препораката од СЗО за опфат од 75 проценти“, кажа Петличковски.
Обезбедени се 60.000 дози од четиритипната вакцина. Во моментот на северната хемисфера доминира инфлуенца тип А.
„Очекуваме вакцината да ги покрие циркулирачките варијанти. Засега има добар одзив, веќе над 30.000 граѓани пројавиле интерес да се вакцинираат“, додава Петличковски.
