Триесет и едногодишен поштар во пробиштипското село Злетово вчера попладне, несакајќи се застрелал во десната потколеница, со пиштол што го поседувал со дозвола, информира полицијата.
Инцидентот се случил околу 13.15 часот, во објектот на „Македонски пошти“ во Злетово.
Според полицијата, поштарот Т.Д., кој дента разнесувал пензии во селото Лесново, со себе го зел и својот пиштол, марка „застава“ калибар 7,65 милиметри, кој легално го поседувал со дозвола за оружје, сосе рамка со осум куршуми.
Кога се вратил во Злетово и сакал да го стави пиштолот од торбата, во која го носел, во футролата на појасот, оружјето истрелало еден куршум, кој завршил во десната нога, нанесувајќи му влезно-излезна рана.
На поштарот му била укажана првична помош во селото, од каде со возило на Итната помош бил пренесен во Клиничката болница во Штип и по санирањето на поврдата бил пуштен на домашно лекување.
Како што информираат од МВР, по овластување на јавен обвинител, увид извршила екипа на пробиштипската полиција.
