Конечниот резултат од пописот на населението се очекува да биде готов до крајот на годинава. Ова за Порталб.мк го изјави заменик директорот на Државниот завод за статистика, Илми Селами. Тој рече дека иако законски имаат рок од шест месеци да ги објават резултатите, истите ќе бидат објавени пред овој рок, односно околу Нова година или најдоцна до крајот на јануари доколку излезе нешто непредвидено, пишува Порталб.мк.
„Да, очекуваме некаде околу Нова година, или пред или по Нова година. Законски имаме шест месеци, но нема да чекаме да поминат шест месеци, ќе биде многу порано. Сите податоци добиени врз основа на пописот, сите податоци, како што беа поставени прашањата, дадени се и одговорите, така што резултатите ќе бидат дадени врз основа на тие прашања. Најдоцна до крајот на јануари, може нешто да излезе. На пример, чекавме институциите да ни ги испратат базите во рок од десет дена, но всушност ни беа потребни 22 дена за да ги испратиме барањата, остана само една институција без да ги испрати. Значи, плус – минус да видиме како ќе се развива практичната работа“, изјави Селами.
Тој информираше дека во моментов се собираат бази на податоци од други институции, кои потоа ќе се комбинираат со податоците од пописот.
„Продолжува обработката на податоци, ги сумираме базите на податоци од институциите кои ги ажурирале. Ги собираме, остана една институција без да ги прати, очекуваме од понеделник да се изврши пресек на веќе добиените податоци од пописот и да видиме како ќе излезат резултатите. Тоа значи дека базите на пописот сè уште не се отворени, бидејќи чекаме да ги добиеме базите на податоци од институциите“, рече тој.
За бројот на лица кои одбиле да се пријават, Селами рече дека тој процент е многу мал и нема да влијае на процентот на конечниот резултат. Сепак, против тие лица ќе бидат поднесени пријави и ќе им бидат изречени казни.
„За секој лице посебно мора да се покрене обвинителен акт и за обвинението е потребен период додека не се внесат сите податоци што ги добиваме од МВР и така натаму, а има многу податоци што треба да се соберат. Ќе бараме да има казни, казните ги изрекува судот, па се надеваме дека ќе има казни за овие бидејќи така е предвидено со закон. Законот предвидува казни кои се движат од 200 до 300 евра по лице. Тоа значи семејство ако се состои од пет члена дека сите пет треба да платат казни за неприфаќање да се попишат. Затоа, потребно е време да се соберат податоци за сите лица. На пример, имаме информација дека во куќа која не ја отворила вратата има пет лица, но во меѓувреме МВР има податоци од границите за влез – излез и може да каже на пример едно лице, да не е дома, туку емигрирал. Сите овие податоци мора да се исчистат“, вели заменик-директорот за статистика.
Процесот на попис на населението е поздравен и во последниот Извештај на Европската Комисија. Во него се наведува дека е постигнат напредок во процесот на подготвителната работа и спроведувањето на пописот на населението, во септември годинава.
„Операцијата на пописната, прва од 2002 година, заврши на 30 септември 2021 година. Забележани се подобрувања во сите статистички области и натамошно приближување на секторската статистика со стандардите на ЕУ. Потребни се постојани напори за подобрување на обемот и квалитетот на макроекономските податоци и социјалната статистика. Бидејќи минатогодишните препораки беа делумно имплементирани, следната година земјата треба особено: да ги обработи и објави резултатите од пописот; да продолжи да ги усогласува финансиските сметки и кварталните национални сметки со Европскиот систем на сметки 2010 (ESA 2010); да обезбеди соодветен кадар и доволно финансиски средства за Државниот завод за статистика“, се наведува во Извештајот.
Според податоците што ги објави ДЗС, со пописот на населението што траеше од 5 до 30 септември, регистрирани се 1.832.696 лица, 568.175 семејства и 837.255 станови. Оние кои од која било причина останале непопишани, ќе се најдат во некоја од базите на податоци при обработката на податоците и ќе бидат дел од пописот.
Последниот попис во Северна Македонија беше спроведен во 2002 година. Десет години подоцна или во 2011 година, тој не беше одржан поради судири меѓу албанските и македонските политички партии околу начинот на спроведување, односно вклучување или не на граѓани кои привремено живеат во странство, а повеќето од нив се Албанци. Беа потрошени два милиони евра, а имаше и предистражна постапка против двајцата водачи на тогашната владејачка коалиција, Никола Груевски и Али Ахмети, но постапката заврши без судски епилог.
