Новиот закон во Калифорнија не значи дека родителите ќе го изгубат старателството ако не прифатат транзиција на полот на нивното дете. Калифорнија е заговорник за споделено родителство и споделено старателство, а во одлучувањето за секое дете поединечно од страна на судовите ќе се земаат предвид бројни фактори, пишува „Вистиномер“ во својата анализа.
Текстот подолу го пренесуваме во целост:
Рецензираме објава на социјалната мрежа Фејсбук во која се вели:
10.09.2023Државното собрание на Калифорнија штотуку усвои нацрт-закон со кој им се дозволува на родителите да го изгубат старателството над своите деца ако одбијат да ја прифатат транзицијата на полот на нивното дете. Тие ги сакаат вашите деца.Државниот сенатор Скот Винер, кој нема деца, е коавтор на законот.
Во склоп на објавата се споделува видео во кое се изнесува дека должност на родителите е да ги поддржуваат и поттикнуваат своите деца да го изразат својот идентитет, но во видеото никаде не се споменува дека родителите, кои ќе одбијат да го прифатат родовиот идентитет на своите деца, ќе го изгубат старателството над нив.
Асошиејтед прес пишува дека критичарите ја извртуваат содржината на законот со којшто ќе се цени (меѓу другите фактори) и дали родителот поддржува транзиција на полот во случаите каде се доделува старателство врз детето.
Демократските пратеници од Калифорнија одобрија нацрт-закон со кој им се наложува на судовите да го ценат, меѓу многуте други фактори и тоа дали родителот одобрува промена на родовиот идентитет, кога досудува кому ќе му припадне старателството. Но, критичарите онлајн тврдат дека мерките одат многу подалеку од тоа и дека значат оти кој било родител што нема да ја поддржи желбата на детето за операција за промена на полот, ќе го загуби старателството врз него. Правните експерти и предлагачот на законот велат дека тоа не е така. Фактите се дека во законот не се споменува директно никаква операција. Тој се однесува за случаи за старателство и им наложува на судиите да ја ценат и поддршката на родителот кон идентитетот на детето, заедно со други фактори, кои, исто така, треба да се ценат, пишува Асошиејтед Прес.
Со законот не се ставаат никакви црвени линии со кои му се забранува на судијата да го додели старателството на родител што не се согласува со тоа неговото дете да го промени родовиот идентитет. Со законот не се доделува детето на родителот кој се согласува со промена на полот.
Медиумот наведува дека на социјалните мрежи се шират дезинформации според кои доколку родителот не е поддржувач на промената на полот на неговото дете тоа по автоматизам значи дека ќе го изгуби старателството врз него, што е невистина.
Законот не е ни од далеку толку ригорозен. Легислативата значи дека судот ќе треба да ги земе предвид и „здравјето, безбедноста и добробитта на детето“, кои, меѓу другите фактори ќе вклучат и „дали родителот ја поддржува промената на полот на детето“.
Иако законот го отсликува ставот на Калифорнија дека генерално одобрувањето на транзицијата е подобро отколку да се негира идентитетот на детето, сепак тој не значи драматична правна промена, вели Алтман.
Во анализа на Сенатот за овој закон, исто така, се нотира дека законот не го обврзува судот да дојде до конкретен однапред предодреден исход, базирано на тоа дали родителот ќе се согласи или нема да се согласи со промената на полот на детето и дека законот не ја поништува дискрецијата на судот да одлучи што е во најдобар интерес на детето.
И наспроти тврдењето во објавата што ја рецензираме дека родителите ризикуваат да го изгубат пристапот до нивните деца, како што пишува Асошиејтед Прес, судовите во Калифорнија најпрво одлучуваат каде детето примарно живее и колку време поминува со секој од родителите, без да му го одземат на еден родител целосно пристапот до детето или до одлучувањето за него.
Калифорнија фаворизира заедничко старателство кога родителите се согласуваат и може да соработуваат во донесувањето одлуки, вели Јан Костело, професор на Лојола Меримаунт Универзитетот.
Вистина е дека јазикот со кој е напишан законот остава нејаснотии околу значењето на терминот „афирмација”. Афирмацијата вклучува сет на дејства и ќе биде различна за секое дете, но мора да ја промовира благосостојбата и здравјето на детето.
Пратеничката од редовите на демократите, Лори Вилсон претходно за Асошиејтед Прес изјави дека афирмација може да значи и да му се дозволи на детето да си игра со играчка којашто е поврзана со неговиот идентитет, дозвола да ги лакира ноктите или да има коса со должина каква што му се допаѓа. Законот не дава специфични барања поврзани со операции за менување на полот кои малолетниците во Калифорнија не може да ги прават без согласност на родителот.
Поради сите горенаведени факти сметаме дека во оваа објава се пропушта контекстот. Новиот закон во Калифорнија не значи дека родителите ќе го изгубат старателството над нивното дете ако не прифатат транзиција на полот. Како што наведовме погоре, Калифорнија е заговорник за споделено родителство и споделено старателство, а во одлучувањето за секое дете поединечно од страна на судовите ќе се земаат предвид бројни фактори.
