Одбиена е жалбата на Фондацијата „Славко Јаневски“, која била поднесена до Министерството за култура, за малкуте доделени пари за „Роман на годината“, соопштија денеска во Фондацијата.
Министерство за култура, за наградата „Роман на годината“ за 2022 одредило сума од 55.965 денари, а лани на истиот конкурс, со решение на истото Министерство, за проектот биле доделени 281.308 денари. Во Фондацијата велат дека не им е јасно зошто парите за оваа намена се намалени за повеќе од пет пати.
Откако одговорните во Фондацијата ја поднеле жалбата, Комисијата за литература и издавачка дејност за 2023 година ја разгледала пријавата за „Роман на годината“ иутврдила дека „жалбата не е потполно оправдана од причини што нема нови докази за да се менува одлуката и предлага жалбата да се одбие“, пишува во известувањето.
Наградата „Роман на годината“ досега е доделена вкупно 24 пати, а со ваква финансиска поддршка, во фондацијата велат дека проектот е сериозно доведен во прашање.
Конкурсот се распишува на 15 декември. Оттаму известуваат дека прават огромни напори да ја подобрат сопствената финансиската состојба, за да можат непречено да го организираат овој конкурс.
