Малопродажните цени на дизелот и на екстра-лесното масло за домаќинство се намалуваат за 3 денари за литар, а малопродажните цени на бензините Еуросупер БС-95 и Еуросупер БС-98 се намалуваат за 2,50 денари за литар, одлучи Регулаторната комисија за енергетика (РКЕ). Освен тоа, се намалува малопродажната цена на мазутот М-1 НС, за 0,8 денари за килограм и сега ќе изнесува 45 денари.
Од полноќ, цената на Еуросупер БС-95 ќе изнесува 81 денари за литар, бензинот со 98 октани ќе чини 83 денари за литар, дизел горивото Еуродизел-БС ќе се продава за 83 денари за литар, додека маслото за горење екстра лесно 1 ќе чини 82 денари за литар.
„РКЕ донесе одлука со која се врши намалување на малопродажните цени на нафтените деривати во просек за 2,97 отсто во однос на одлуката од 6 октомври.
Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 5,5 отсто, кај дизелот за 6,3 отсто, кај екстра лесното масло има намалување за 6,7 отсто и кај мазутот намалувањето е за 2,4 отсто“, наведено е во соопштението од РКЕ.
