Партнерството на САД и на Германија е еден од најсилните сојузи што светот досега ги видел, изјави денеска претседателот на САД, Барак Обама, во германскиот град Крин, каде пристигна на Самитот на лидерите на Групата седум индустриски најразвиени земји, Г7.
Обама во Крин се појави со германската канцеларка Ангела Меркел, со која е поблизок отколку со повеќето шефови на државите, иако односите меѓу двете земји се затегнати во последните две години, откако беше откриено дека американската Националната агенција за разузнавање (НСА) го прислушувала и нејзиниот телефон.
Шефовите на држави и на влади на Г7 за време на дводневниот самит ќе разговараат за економијата, Европската унија, трговските договори, руско-украинските односи, екстремизмот и за климатските промени, рече американскиот претседател.
Крин е на неколку километри од замокот Елмау, во јужниот дел на Германија, каде ќе се одржува самитот.
Неколку стотици демонстранти ги блокираа патиштата што водат до замокот во Баварските Алпи. Околу 22.000 полицајци го обезбедуваат замокот и имотот и ја формираа „забранетата зона“, која се протега неколку километри.
This is the luxurious German resort hosting Pres. Obama and other world leaders during G-7: http://t.co/6GE6TmqNwz pic.twitter.com/BjLRtUu3sY
— ABC News (@ABC) June 7, 2015
Гостите и новинарите до замокот се транспортирани со хеликоптери. Околу 200 демонстранти пристигнаа до оградата која полицијата ја постави за да ги спречи учесниците на протестите да стигнат до замокот. Демонстрантите извикуваа „Слобода и мир, а не повеќе Г7“ и носеа транспаренти со слогани како што се „Политика за народот, а не за пазарот“.
Г7 се состои од Велика Британија, Франција, Канада, Германија, Италија, Јапонија и од САД.
