Во заедничка координирана акција на Секторот за внатрешни работи Охрид и на Управата за јавни приходи (УЈП), кај пет обложувалници биле констатирани прекршоци на законот за игри на среќа и забавни игри. Контрола била извршена во 20 обложувалници во Струга, Кичево, Дебар и во Центар Жупа.
Една обложувалница во Центар Жупа и две обложувалници во кичевските села Зајас и Грешница приредувале игри на среќа без лиценца, односно без дозвола од надлежен орган.
– Во обложувалницата во општината Центар Жупа одземени се пет телевизори, два компјутери, еден принтер, 4.548 денари и друга опрема. Во обложувалница во селото Зајас одземени се два телевизори, два компјутери, еден принтер, 1.880 денари и друга опрема, а во село Грешница одземени се два телевизори, два компјутери и три принтери. При контрола во обложувалница во селото Зајас, констатирано е дека извршува дејност без регистрирана фирма, за што се изречени глоби врз основа на законот за регулирање на готовински промет – соопшти Стефан Димоски, портпарол на СВР Охрид.
Неправилности се констатирани и во обложувалници во струшките села Подгорци и Долно Татеши поради немање фискален апарат, а една обложувалница е затворена до 30 дена.
Во согласност со Законот за игрите на среќа и забавните игри, на правните лица каде се констатирани неправилности, ќе им бидат поднесени кривични пријави.
В.М.