Македонија и Косово потпишале договор за воведување на заеднички гранични контроли во железничкиот сообраќај уште во 2011 година, но до денешен ден не е изградена заедничката зграда за царината, полицијата и инспекциските служби. Како што информираат за „Мета.мк“ од Министерството за транспорт и врски, ваквиот објект треба да го изгради косовската страна во Хани и Елезит, по што целокупната контрола на границата меѓу двете земји би се вршела на едно место.
Но, доцнењето на изградбата на заедничкиот објект меѓу Македонија и Косово не е единствениот проблем за меѓународниот железнички сообраќај. Нашата земја и со Србија требаше да воведе заедничка гранична контрола, при што обврската за изградба на идниот објект во овој случај е наша и ќе треба да се изведе до железничката станица во Табановце. Иако спогодбата меѓу македонската и српската влада беше потпишана во 2015 година, финансиите за заедничкиот граничен премин дури сега се обезбедуваат, а воведувањето на заедничките гранични контроли ќе ја чека 2023 година.
Од Железници на РСМ – Транспорт за „Мета.мк“ посочуваат дека заедничките гранични објекти не се во нивна ингеренција, но чекањето на возовите за гранична контрола на двете страни од границата многу ги засега. Тие посочуваат дека поволностите од воведувањето на заеднички гранични контроли се првенствено во намалувањето на царинските формалности. Пратките пратени со воз побрзо ќе стигнуваат до клиентите, а ќе се зголеми и протокот на товарни возови на самите гранични премини.
Освен со Србија и со Косово, спогодба за идни заеднички контроли на границата треба да се склучи и со Грција, но прашање е и таа кога ќе се реализира.
– Со Република Грција постапката за склучување билатерални договори за двата премина е во напредна фаза – велат од Министерството за транспорт и врски.
Во случајот со Грција, на преминот Гевгелија – Идомени ќе треба да се гради заедничка гранична зграда во Гевгелија. На преминот Кременица – Неа Кафкасос, Грција треба да го презеде задолжението за подигање на ваков објект во Неа Кафкасос. Министерот за транспорт и врски Горан Сугарески во февруари годинава нагласи дека двете земји треба да го финализираат текстот на Спогодбата за утврдување на граничните процедури за двата железнички премина, но ваквиот документ не е потпишан до денешен ден.
