Адвокатите на Зоран Заев на денешното рочиште за случајот „Поткуп“ го оспорија легитимитетот на обвинителот Владимир Милошевски и до судот приложија одлука на Советот на јавни обвинители, според која на Милошевски му е истечен мандатот во обвинителството за организиран криминал и за корупција.
Според одлуката на Советот, што ја приложија адвокатите, Милошевски бил привремено распореден во Основното јавно обвинителство за организиран криминал и за корупција на 1 јуни 2016 година до 30 ноември, кога му истекол мандатот.
– Имаме ситуација во која обвинител нема овластувања да презема какви било дејства во име на ОЈО за организиран криминал и корупција и не може да застапува обвиненија на ова обвинителество – рече адвокатот на Заев, Филип Медарски.
На ова, Милошевски пред судот изјави дека предметот го застапува ОЈО за организиран криминал и корупција, а со оглед дека предметот му е даден и е присутен на рочиштето, тој може да го застапува.
Адвокатот на Заев, Јаким Неделков, од судот побара да се изјасни и да донесе решение дали ќе му дозволи на јавен обвинител со истечен мандат и без легитимитет да застапува обвинение. По ова судијката Дијана Груевска-Илиевска даде пауза од 10 минути и се повлече со членовите на судечкиот совет за да донесат одлука по наводите на одбраната на Заев.
