Претседателот на Русија, Владимир Путин, го осуди американскиот напад на Сирија и рече дека тоа е агресија врз една суверена држава и кршење на меѓународното право, соопшти денеска Кремљ.
Дмитриј Песков, портпаролот на рускиот претседател, рече дека Путин смета дека нападот е обид да се сврти вниманието на меѓународната заедница од големиот број цивилни жртви во операциите на коалицијата предвидена од САД во Ирак.
Со американскиот напад на Сирија веројатно е окончана соработката на Русија и на САД во Сирија, изјави утринава висок руски претставник.
Претседавачот на Комитетот за надворешни работи на Горниот дом на рускиот парламент, Константин Косачев, на социјалната мрежа „Фејсбук“ напиша дека соработката е окончана, додавајќи дека таа „дури и не функционирала“.
Косачев оцени дека тоа е штета и сугерираше дека Пентагон извршил притисок врз претседателот Доналд Трамп. Тој додаде дека додека руските крстосувачки ракети гаѓале терористи, „американските ракети гаѓале сили на сириската влада кои се борат против терористи“.
САД утринава по наредба на Трамп изведоа воздушен напад на сириска воздухопловна база, како одговор на нападот со хемиско оружје на цивили во Сирија.
