Најголем број на бруцоши денес се собраа во Филхармонија на првиот академски час за учебната 2022/2023 година на Факултетот за информатички науки и компјутерско инженерство (ФИНКИ) при Универзитетот „Св. Кирил и Методиј“ во Скопје.
На свечената церемонија на новозапишаните студенти им беа доделени индексите, а на најдобрите матуранти им беа доделени стипендиите.
На студентите им се обрати деканот, проф. д-р Боро Јакимовски, кој истакна дека ФИНКИ е најголемиот факултет во Македонија и во Југоисточна Европа и дека годинава има повеќе од 1.100 нови студенти.
„Горди сме што во последните 10 години сме факултет со најмногу студенти и најмногу научни трудови. Го избравте ФИНКИ, сега вие сте ФИНКИ. Ние создаваме услови за да добиете знаење“, рече тој додавајќи дека целта на факултетот е да создадат инженери кои ќе креираат свои бизниси и апликации.