Министерот за внатрешни работи Оливер Спасовски, заедно со дел од раководствата на Министерството за внатрешни работи и на Македонскиот полициски синдикат, го посети Центарот за обука на МВР во Идризово, каде што во тек е процесот на селекција на кандидати за 12-месечна основна обука за полициски службеници, во генерацијата 2023-2024 за кој Министерството за внатрешни работи имаше распишано јавен оглас.
Спасовски информира дека годинава се пријавени 1.458 лица, од кои 1.105 се мажи и 353 жени. Селекцијата на кандидатите започна на 27 септември, со утврдување на исполнетоста на посебните услови, како што се потребната висина и проверка на моторичките способности. Обуката се состои од теоретска настава и ситуациони вежби, кои се спроведуваат во Центарот за обука, но и практичен дел на стекнување на вештини, кои се изведуваат во полициските станици, при Секторите за внатрешни работи.
Министерот потенцираше деја е спроведена реформа со која е сменет концептот на вработување на полициските службеници, и воведување забрана за членување во политичка партија и задолжителен тест за интегритет и увид во имотната состојба, за да се спречи корупцијата и злоупотребата на службената положба.
„Полициските службеници се на браникот на државата и на граѓаните и веќе не може да стане збор за исполнување на некои туѓи интереси, а ресурсите на МВР не може да се користат во партиски цели. Ова е навистина сериозен пристап во продуцирање на професионални и компетентни полициски службеници, кои во иднина ќе ги остваруваат своите професионални задачи и обврски, постапувајќи согласно Уставот, законите и подзаконските акти, а со тоа ќе придонесат кон подобрување на безбедноста на граѓаните”, истакна Спасовски.