Сите напори мора да бидат вложени во обидот да се обезбеди мир во Сирија, изјави германската канцеларка, Ангела Меркел, на конференцијата за новинари по состанокот со ирачкиот премиер, Хајдер Абадиј.
– Меѓународните околности во врска со Ирак се многу комплицирани и поради тоа се сложивме дека е неопходно да се вложат сите напори денеска во Минхен да разговараме за иднината на Сирија и да придонесеме за мир во регионот – изјави Меркел.
Министрите за надворешни работи на 17 земји-членки на контакт-групата за Сирија се собраа во Минхен во обид да го покренат сирискиот мировен процес, а домаќини на состанокот се американскиот државен секретар, Џон Кери, и шефот на руската дипломатија, Сергеј Лавров.
Сирискиот мировен процес е на граница на пропаѓање, додека на Европа ѝ се заканува уште еден голем прилив на бегалци откако десетина илјади Сиријци се наоѓаат на турската граница.
Русија предложи примирјето во Сирија да стапи на сила на 1 март, но Вашингтон верува дека Москва со тоа си дава себе и на сириската влада три недели за да се обидат да ги уништат умерените бунтовнички групи.