Просечната оцена од полагањето на осмата државна матура, за 2014/2015 година во јунската сесија, по сите предмети и во сите средни училишта во Република Македонија е 3,37, соопшти денеска директорката на Државниот испитен центар (ДИЦ), Мируше Ахмети.
Годинешната просечна оцена е повисока од минатогодишната, кога средниот успех беше 3,11.
Според обработените податоци, по предметот мајчин јазик и литература средната оценка е 3,47, математика е 3,19, англиски јазик – 3,10, а кај другите три странски јазици има изнесува 3,54.
Годинава, за разлика од претходните години, кога прелиминарите резултати беа објавувани со просечните оцени за секој јазик одделно, ДИЦ ги објави вкупните просеци за мајчините јазици (македонски, албански и турски) и за странските јазици, освен англиски (француски, германски и руски).
Според резултатите, кај другите предмети средните оцени се: филозофија 3,67; естетика 3,81; бизнис 3,43; хемија 3,50; биологија 3,64; физика 3,44; историја 3,52.
Од ДИЦ соопштија дека прелиминарните резултати ќе бидат објавени на 14 јули напладне, кога почнува и рокот за поднесување приговори, кој ќе трае три дена.
Во јуни на државната матура биле пријавени 52.090 кандидати по сите предмети. На тестирањата учествувале 49.861 кандидат, а отсуствувале 2229.
Учениците што отсуствувале, не положиле или не положиле во целост, ќе имаат уште една шанса во август.
