Министерот за одбрана на Република Македонија, Зоран Јолевски, денеска ќе има средби во Националната гарда на Вермонт и на Универзитетот „Норвич“.
Во рамки на посетата, Јолевски ќе оствари средба со претседателот на Универзитетот, Ричард Шнајдер, како и со заменик-претседателот за академски работи и декан, Гујоу Хуанг.
Заедно со началникот на Генералштабот на Армијата на Република Македонија, генерал-потполковник Методија Величковски, министерот Јолевски ќе се сретне со командантот на Националната гарда, генералот Креј, како и со претставниците на државата Вермонт во Конгресот и во Сенатот на САД. Министерот Јолевски и генералот Величковски ќе присуствуваат и на церемонијата за пензионирање на генералот Дуби, поранешен командант на Националната гарда.
Универзитетот „Норвич“ е најстариот приватен воен универзитет во САД. Република Македонија има воспоставено плодна соработка со универзитетот, на кој се школувале и студенти од земјава.
