Претседателот Ѓорге Иванов на вонредниот самит на лидерите на процесот Брдо-Бриони, кој се одржа денеска во Загреб, рече дека недоволната безбедносна соработка во регионот е сериозен проблем.
„Земјите од регионот соработуваат во многу сфери, но не и во безбедноста, а сè е условено од безбедноста и од стабилноста. Тоа е последното предупредување дека земјите од регионот треба неодложно да ја максимизираат соработката во сферата на безбедноста“, рече Иванов.
Учесниците оценија дека актуелната криза со мигрантите претставува предизвик без преседан како од хуманитарен, така и од безбедносен аспект, кој бара дијалог и согласност за подобро да се заштитат надворешните граници на ЕУ и значително да се олесни притисокот на бегалците врз погодените држави.
Лидерите што учествуваат на процесот Брдо Бриони ја обновија посветеноста кон градењето доверба, развојот на билатерален и регионален дијалог и кон помагањето, помирувањето и соработката.
Во заклучоците на самитот е истакнато дека е неопходен редовен дијалог на оперативно ниво меѓу САД, Европската унија и земјите од Југоисточна Европа за успешно спротиставување на глобалните безбедносни закани.
Учесници на процесот, освен лидерите на државите од Западен Балкан, беа и американскиот потпретседател Џо Бајден, претседателот на Европскиот совет, Доналд Туск, и лидерот на Австрија, Хајнц Фишер.
