Инцидент се случи на денешното судење на членовите на Златна зора во затворот „Коридалос“ во Атина. На судењето упаднаа членови на терористичката организација Огнени јадра, чие судење беше паралелно закажано во соседната судница во затворот и почнаа вербално да ги напаѓаат членовите на Златна зора. Покрај вербалните навреди и довикувањата дека фашистите ќе ги стигне бесилка, во истиот момент припадниците на Огнени јадра почнаа да фрлаат и со шишиња и со различни предмети во судницата по членовите на Златна зора. Дел од предметите завршија кон делот каде се наоѓаа новинарите и фоторепортерите.
По полициска интервенција беа отстранети припадниците на Огнени јадра од судницата, но инцидентот создаде атмосфера на страв, вознемиреност и на паника во судницата. Голем број од присутните се почувствуваа небезбедно и несигурно, бидејќи при толку големо полициско обезбедување беше дозволен упад на судењето. Адвокатите што ги бранат обвинетите членови на Златна зора реагираа дека судењето не може да се одвива во вакви услови, а судот беше повикан да преземе одговорност за инцидентот, додека, пак, присутните извикуваа „срамота, убијци, сите ќе нè убијат“.
Непријатниот инцидент само повеќе ги засили барањата на присутните да се одреди нова, поголема и побезбедна судница каде ќе се одвива процесот против Златна зора.
За време на судењето, полицијата добила известување и за можна бомба во затворот. Анонимни јавувачи пријавиле дека ќе биде активирана бомба во затворот, во весникот „Весник на новинарите“ и информативниот портал „зоугла.гр“ (zougla.gr), но и покрај тоа полицијата не ги евакуираше присутните на судењето.
По инцидентот процесот беше прекинат и ќе се продолжи на 4 јуни. Судскиот процес против Златна зора, кој има цел да открие дали неонацистичката партија навистина е криминална и паравоена организација, сè уште е во почетните фази и досега четирипати се прекинува и се одложува без некаков суштински напредок. Лидерите на партијата не се појавуваат воопшто на судењата, чекор кој се оценува како нивни обид за потценување на судот.
