Наставата во основните училишта во Аеродром секој понеделник ќе започнува со интонирање на македонската химна, објави Тимчо Муцунски на својата Фејсбук страница. Тој сподели и видео од учениците во основното училиште „Лазо Ангеловски“ како ја пеат химната.
Според Муцунски, почитта и љубовта кон татковината се градат од најмала возраст.
„Станува збор за иницијатива преку која изразуваме искрена почит кон татковината и со која имаме цел да го подигнеме националното чувство и љубовта на дечињата кон Македонија, но и ќе ги охрабриме да учат за македонската култура и традиција“, дополни Муцунски.
Инаку, слична ваква пракса беше имплементирана во основните училишта во општина Аеродром во 2017 од страна на тогашниот градоначалник Ивица Коневски.
Во Законот за употреба на грбот, знамето и химната на Република Северна Македонија не постојат никакви препораки во врска со интонирањето на химната во училишта.
