Лидерот на ВМРО-ДПМНЕ, Никола Груевски, во интервју за бугарската државна телевизија БТВ, изјави дека создавањето на нова влада, поддржана од албанските партии ќе доведе до крај на македонската држава во сегашната форма и крие опасност за нов етнички конфликт на Балканот.

– Носењето на платформата на албанските партии е обид не само за редефинирање на државата, туку за повторно преговарање за Охридскиот договор од 2001 година. Тоа е опасна работа, тоа е отворање на Пандорината кутија. Во Македонија живеат повеќе етнички заедници кои можат да си побараат нешто ново, вклучително и Македонците, но тоа повторно преговарање е опасна работа. Тоа може да нè врати во 2001 година – вели Груевски.

Авторот на интервјуто коментира дека Пандорината кутија беше отворена уште пред две години кога опозицијата почна да објавува снимки од нелегално прислушување на десетици илјади македонски граѓани, откривајќи огромна злоупотреба на власт и корупција од стотини илјади евра во редовите на ВМРО-ДПМНЕ.

„Овие записи доведоа до најмасовните антивладини протести и првото во историјата обвинение против македонски премиер. Специјалното јавно обвинителство го обвини Груевски дека нарачал јавно претепување на градоначалникот на општина Центар, Андреј Жерновски, во текот на летото на 2013 година“, се вели во коментарот од телевизијата.

На прашањето дали си го препознава својот глас во снимките, Груевски не даде конкретен одговор.

„Нашиот став за ова прашање беше јасен – дека станува збор за креирани, монтирани материјали, употребени за да се уништи кредибилитетот на институциите и на политичарите. Значи не се работи тука само за гласот, туку се работи за прашања што се поврзани со креирани, едитирани и монтирани материјали“, вели Груевски.