Премиерот Никола Груевски во денешното интервју за порталот „Прес 24“ прави аналогија на легендарниот бокс-меч меѓу Мохамед Али и Џорџ Форман и неговата битка со лидерот на опозицијата, Зоран Заев. Груевски вели дека противникот го мотивирал слично како што тоа му го направил Форман на Али.
– Се сеќавате на познатата „рамбл ин д џангл“ (Rumble in the Jungle), најпознатата битка на Касиус Клеј, односно Мохамед Али откако го промени името, во целата негова кариера. Беше многу одамна. Никој тогаш не очекуваше дека Али ќе победи со Џорџ Форман, поради подготвеноста на противникот или, во случајов, противниците би рекол, но сепак, на крај, тој победи.
Тоа што Мохамед Али успеа е да го надмудри и психолошки да го победи својот противник. Противникот на Али, Форман, имаше направено цеосно погрешна процена за чекорите и за начинот како Али ќе се бори. Форман на почетокот удираше и удираше, а Али го допушташе тоа, рунда по рунда. Али пушташе Форман да удира, „роуп а доуп“ (rope a dope) ја нарекоа неговата стратегија, и се случи Форман во осмата рунда да се умори, а Али тогаш почна. И ми се чини дека заврши со нокаут, Форман беше декласиран. Е сега, сите се прашуваа во првите осум рунди зошто Али така боксува, мислеа дека е наместен мечот, мислеа дека Али е ослабен, но вистината беше дека Али имаше стратегија и се однесуваше поинаку од тоа што неговиот противник го профилирал за него. Осмата рунда за Заев допрва доаѓа, а финалниот удар ќе дојде на 24 април – изјави Груевски.
