Премиерот Никола Груевски денеска нема да се појави на сослушување во Анкетната комисија за скандалот со прислушувањето поради редовните обврски, а ќе одговори на поканата на 14 декември 2015 година и ќе се обрати пред пратениците, соопштија денеска од ВМРО-ДПМНЕ.
Премиерот денеска требаше да биде прв сведок на седницата на Анкетната комисија за скандалот за прислушувањето, а е предложен од ВМРО-ДПМНЕ.
Според распоредот, кој во понеделникот го најави претседателот на комисијата, Петре Шилегов, утре како сведоци треба да се појават Мартин Протоѓер и Зоран Ставрески, а в петок – Сашо Мијалков.
За следната недела се закажани сведочењата на Гордана Јанкулоска, в понеделник, и на Миле Јанакиески, во вторник.
Шилегов во понеделникот рече дека распоредот е јавен повик до лицата во посочените термини да се јават пред анкетната комисија и да дадат сопствена изјава за фактите, околностите и за содржината за објавените прислушувани разговори.
На ова реагираше ВМРО-ДПМНЕ, од каде го обвинија Шилегов дека сам закажува, сам откажува седници и сослушувања, како целата анкетна комисија да е негова приватна сопственост и играчка.
Антонио Милошоски побара седниците на кои ќе сведочат сведоците предложени од ВМРО-ДПМНЕ да не бидат отворени за јавност.
Според деловникот за работа на комисијата, сведоците можат да побараат седниците да бидат затворени за јавност, но, исто така, тоа можат да го побараат и членовите на комисијата со мнозинство гласови. Сведоците што ќе бидат повикани од Анкетната комисија немаат законска обврска да прифатат да сведочат.
Сите активности на Анкетната комисија за скандалот со прислушувањето треба да завршат до 22 јануари 2016 година, а извештајот на комисијата треба да биде готов до 31 јануари.
