Претседателот на Асоцијацијата за цистична фиброза, Фики Гаспар, по денешната средба во Министерството за здравство, рече дека ако сè се одвива според договореното околу лекот трикафта, протести нема да има. Тој кажа дека на состанокот во министерството било посочено дека работната група што ја чекале да заврши со работа веќе е при крај и дека ќе се направи системско решение за тоа кои пациенти треба да го примаат лекот трикафта, а ќе има и забележување на состојбата на пациентите за да може да се почне со набавка на терапија.
„Нè известија дека цело време се во контакт со фирмата што треба да го набави лекот“, рече Гаспар.
Тој потсети дека се размислува за протест во овој период, но ако работите што им биле кажани се движат во добра насока, протест нема да има.
„Ќе имаме повеќе информации од Министерството за здравство во рок од една недела или две. Немаме простор за чекање. Доколку целото членство гласа дека не сме задоволни, претпоставувам дека ќе се оди на протест“, додаде Гаспар.
Дванаесет пациенти добиваат трикафта. Овој лек значително ја олеснува болеста на лицата со цистична фиброза. Целта на Асоцијацијата е да се избори лекот да го добијат сите пациенти во државата, кои се околу 130.
