Фатон Ахмети, денеска на социјалните мрежи објави дека си поднесува оставка од функцијата генерален директор на Фондот за здравствено осигурување (ФЗО). Во својата објава напишал дека поднел оставка за да се посвети на партиските задачи со максимална посветеност во реализација на визијата на лидерот на ДУИ, Али Ахмети.
Тој на оваа позиција беше назначен пред две години. Во „негово време“ се случи хаварија во системите во ФЗО. Во февруари годинава, по сајбер нападот на системот на ФЗО, тој не присуствуваше на брифингот за новинари да објасни што се случува. Не беше присутен ниту еден информатички експерт кој работел на отстранувањето на проблемот.
Директорката Магдалена Грашкоска тогаш рече дека ИТ експертот по напорна работа имал влошено здравје и бил хоспитализиран.
„Не сум ИТ стручно лице и се потпирам на информациите на експертите. Она што можам да кажам е дека на 6 февруари забележавме технички проблем и ги исклучивме системите. Пријавивме во МВР и во исто време почнавме со дијагностика. Се соочивме со два тешки момента – од една страна со сајбер напад, а од друга, со момент кога сфативме дека решавањето ќе потрае и дека треба да преминеме на преодни решенија со цел да функционираме“, рече тогаш Грашкоска.
