Британските служби уапсиле тројца бугарски државјани за шпионажа во корист на Русија, пренесува mediapool.bg. Еден од уапсените лица бил поранешен советник во бугарското Министерство за енергетика. Тројцата биле задржани уште во февруари годинава, но информацијата од британските власти е објавена денеска.
Тројцата бугарски државјани се во притвор, а според објавените информации станува збор за 45-годишниот Орлин Русев, 41-годишниот Бисер Џамбазов и 31-годишната Катрин Иванова. Британските власти ги обвинуваат дека работеле за руските безбедносни служби. Сите тројца подолг период живееле во Обединетото Кралство.
Најистакнатиот меѓу нив, поранешниот советник Русев имал бизнис контакти со Русија, а се преселил во Обединетото Кралство во 2009 година. Џамбазов и Иванова пак заминале од Бугарија пред околу 10 години, тој работел како шофер во болница, а Иванова работела како лаборантка во приватно здравство.
Тројцата обвинети државјани на Бугарија не се изјасниле во однос на поднесените обвиненија, а се очекува да бидат изведени пред судот во Лондон во јануари.