Македонија најверојатно ќе биде на дневен ред на состанокот на министрите за надворешни работи на ЕУ в понеделник, на барање на некои земји-членки како Австрија, потврдија за „Мета“ извори од Советот на ЕУ.
Дипломатски извори информираат дека безбедносната процена за Македонија не е негативна со оглед на тоа дека таканаречената терористичка група е уапсена.
– Ова е завршена работа, ќе знаеме повеќе кога ќе заврши истрагата – изјави висок европски дипломатски извор.
За Европската унија, во Македонија не станува збор за меѓуетнички конфликт бидејќи сите партии, вклучително и албанските, се дистанцираа од кумановската група.
Дипломатите во ЕУ порачуваат дека засега не е јасно која е таа група, дали е терористичка или криминална, и се чека независна истрага во Македонија.
Европските дипломати сметаат дека изјавата на претседателот Ѓорѓе Иванов дека 17 служби на земји-партнери биле информирани, но не реагирале, не ѝ е упатена на Европската унија, туку дека е многу поширока.
– И ЕУ и НАТО ја изразија нивната солидарност со земјата. Таа изјава не е против ЕУ – тврди нашиот извор.