Движењето за реформи на ДПА на Зијадин Села на прес-конференција, обвини дека во тетовскиот Основен суд се соочуваат со постојани уцени во текот на регистрацијата на партијата. Според нив процесот на регистрација на новата партија започнал пред 45 дена, но тетовскиот суд постојано барал дополнителни документи одолговлекувајќи ја постапката.
– Сето ова време додека ги собиравме документите за регистрација на партијата, од тетовскиот суд бевме уценувани со безброј услови, кои треба да ги исполниме за регистрација. Ние не сме единствениот политички субјект, кој поднесува барање за регистрација на партија, пред нас се регистрирани стотици политички партии. Иако сме ги собрале сите потребни документи за регистрација, во ходниците на овој суд постојано одредени вработени, ни даваат до знаење дека не можеме да ја регистрираме нашата партија, бидејќи преставува опасност за општеството – изјави Алил Фетаи од Движењето за реформи на ДПА.
Од Движењето, велат дека крајниот епилог на тетовскиот суд, ќе преставува голем доказ дали судовите работат чесно и независно, или пак работат во служба на власта и политичарите, кои надежите за нивниот политички опстанок, ги имаат насочено на телефонските повици кон судиите.
Движењето за реформи на ДПА, се основа откако струшкиот градоначалник Зијадин Села, го прекина членството во ДПА, поради недоразбирање со претседателот на партијата Мендух Тачи, околу изборните листи, за време на последните парламентарни избори.
Движењето на Села е во коалиција со НДП. Двата политички субјекти, најавија заеднички настап на престојните предвремени избори, за кои според нив треба да се организираат по моделот на една изборна единица.
З.Д.
