Двајца припадици на турските безбедносни сили се убиени, а 24 се ранети во самоубиствен бомбашки напад во близина на градот Догубајазит, во провинцијата Агри, близу турската граница со Иран, соопштија претставници на локалните власти.
Нападот се случил во 3 часот според локално, односно околу полноќ според средноевроско време.
Според турските медиуми, трактор натоварен со два тони експлозив бил детониран од бомбаш-самоубиец, пред станица на воената полицијата.
Локалните власти соопштиле дека одговорни за нападот се милитанти на Курдската работничка партија (ПКК), против која турската армија од 24 јули спроведува воздушни напади од двете страни на турско-ирачката граница.
Сепак, како што јавува „Би-Би-Си“, гувернерот на областа каде се случил нападот, не соопштил како и врз основа на што ја идентификувале ПКК како одговорна за експлозијата.
Од ПКК засега нема коментар за нападот.
