Во Струга, на летен камп наречен „Моето срце во сите бои“ годинава учествуваат повеќе од 20 деца со вродени срцеви маани и нивните семејства.
Кампот трае една седмица, а е дел од рехабилитациониот процес после медицинскиот третман.
Тој се одржува 15-та година по ред, а е организиран од Клиника Жан Митрев во соработка со Црвен крст на Град Скопје.
„Преку овој камп целта на Клиниката Жан Митрев е да ја продолжи грижата и терапевтскиот процес надвор од болничкото окружување, во природна атмосфера и соодветен амбиент. Сите активности, играта, забавата и дружбата се искомбинирани со психолошки, интерактивни и физиотерапевтски вежби со кои се поттикнува физичкиот, емотивен и социјален развој и по напуштањето на болницата“, се вели во соопштението.
Рехабилитационите активности се одвиваат под надзор на тим доктори и терапевти – психотерапевт, лиценциран психолог и семеен и системски советник.