Силен, пороен дожд со грмотевици и со ветер го зафати ноќеска битолско-пелагонискиот регион.
Дождот истураше до раните утрински часови, а според Управата за хидрометеоролошки работи, наврнаа 53 литри на еден квадратен метар. Дождот повторно ги стави во стравувања пелагониските земјоделци.
Силните и поројни дождови во битолско-пелагонискиот регион веќе ѝ пркосат на есенската берба на родот, а се сериозна закана и за реализирањето на есенската сеидба во најголемата житница во државата, се жалат земјоделците.
Штетите се бележат на бербата на сончогледот, првите и најквалитетни лисја на тутунот, како и на градинарските производи, пиперката и на компирот. Земјоделците се жалат дека пиперката веќе е под вода и скапува, исто како и компирот и доматот.
– Се надеваме дека времето ќе попушти, зошто од силниот дожд веќе имаме штети на сончогледот, најквалитетните листови од тутунот сега се берат, а не може да се влезе по нивите. Под знак прашање е и бербата на пиперот и на другите градинарски култури – вели Вељо Тантаров, претседател на Сојузот на земјоделци.
Најголемите стравувања за земјоделците од овој регион е реката Црна. Акцијата за чистење на реката е во тек. Локалните власти убедуваат дека ситуација е стабилна и нема пријави за излевање на реката по земјоделските површини.
– Ситуацијата во Пелагонија е под контрола, до вчера успеавме да ги затвориме сите 16 пропусти, а помогна и чистењето на коритото на реката од големата вегетација, од дрвја и од наноси. Засега немаме пријави за штети од дождот – вели градоначалникот на општина Новаци, Лазар Котевски.