Додека граѓаните ги чекаат повиците на општинските власти од Скопје, Битола, Кичево и Тетово за добивање ваучери од 60.000 денари за набавка на инвертер клима уреди, Министерството за економија го објави јавниот оглас за надоместување на дел од трошоците за набавка на печки за греење на пелети. Државата преку оваа мерка ќе издвои околу 480.000 евра за субвенционирање на набавката на печки на пелети.

Граѓаните годинава се поделени на две категории, при што лицата со ниски примања ќе можат да аплицираат за субвенции до 70 отсто, но не повеќе од 25.000 денари по домаќинство како поврат на средства за набавената печка за пелети. На останатите граѓани ќе им бидат достапни субвенции до 50 отсто за купеното грејно тело, но не повеќе од 20.000 денари по домаќинство.

Во категоријата домаќинства со ниски примања влегуваат оние кои имаат семејни нето примања до 30.000 денари по месец, пензионери или еден брачен другар пензионер со месечни нето примања до 20.000 денари по месец, како и ранливите потрошувачи утврдени со Програмата за заштита на ранливи потрошувачи на енергија за 2020 година.

Право на учество на огласот за доделување субвенции ќе имаат оние домаќинства кои ќе набават печки на пелети во периодот од 1 јануари до 6 март 2020 година. Повратот на средства од Министерството за економија ќе се врши според принципот „прв дојден, прв услужен“, а подетални информации за огласот може да се пронајдат на веб-страницата на Министерството за економија.

Покрај субвенционирањето на печки за греење на пелети, државата преку Министерството за економија годинава ќе додели субвенции во висина од 400.000 евра за купување на ПВЦ или алуминиумски прозорци во домаќинствата. Водечката мерка на владата за годинава ќе биде доделувањето на ваучери за набавка на инвертер клима уреди на 10.000 домаќинства во четири општини, за што ќе се потрошат 10 милиони евра.

И додека дел од овие мерки на владата се преземаат како поттик за намалување на аерозагадувањето во македонските градови, дел од експертите веќе предупредија принципот на доделување средства од државата се одвива инцидентно. Без формирање на национален Фонд за енергетска ефикасност на којшто би му се обезбедиле континуирани средства по години за реализација на ваквите проекти, на подолг рок нема да се намали потрошувачката на енергија од домаќинствата во зимскиот период, а со тоа и аерозагадувањето низ градовите.