Членството во Европската Унија за Република Македонија останува приоритет и на тоа ќе бидеме силно фокусирани и во наредниот период, истакна премиерот за спроведување на изборите, Емил Димитриев, по средбата со амбасадорот на ЕУ, Самуел Жбогар, кој му го предаде извештајот од ЕК за земјава.
– Членството во Европската Унија за Република Македонија останува приоритет и на тоа ќе бидеме силно фокусирани и во наредниот период. Укажувањата и забелешките што се дел од извештајот ги сметаме за нов патоказ за нашите активности. Се надеваме дека со одржувањето на изборите со формирањето на политичката влада, ЕУ-агендата повторно ќе дојде на дневен ред, како еден од највисоките приоритети со многу посилен фокус од она што го имавме во изминатава година бидејќи ова беше година во која се соочувавме со големи политички предизвици, мигрантската криза, владата функционираше како техничка влада за спроведување на изборите – истакна Димитриев.
Eвроамбасадорот Жбогар посочи дека извештајот е искрен и оти има многу препораки кои можат да бидат искористени од институциите, кога се дискутура за реформите кои се очекуваат по изборите.
– На изборите гледаме со надеж дека би можеле да бидат почеток на нов процес и во земјата, но и нов процес во рамките на Европската Унија – додаде Жбогар.
