Седумгодишното момче, чии родители утрово загинаа во сообраќајна несреќа на магистралниот пат Удово – Демир Капија, е префрлено на скопските клиники и се наоѓа во критична состојба, соопшти попладнево Јавното обвинителство.
Во сообраќајната несреќа, како што информираат оттаму, учествувале три возила, а во несреќата повредена е и германска државјанка, која била сопатничка во едно од возилата. Таа, со потешки повреди е задржана на лекување во Општата болница во Велес.
Во несреќата животите ги загибија сопружниците Н.П. (41) и Б.П. (32).
„Сообраќајната несреќа се случи утрово, на магистралниот пат Демир Капија – Удово, кај местото Света Петка, кога се судриле автомобил „aуди a4“ со германски регистарски таблички, управуван од српскиот државјанин Д.С. (46), автобус на „Струмица експрес“, управуван од Ѓ.В. (60) и автомобил „фиат сеиченто“ со скопски регистарски таблички, управуван од Н.П. (41). Во несреќата загинаа возачот на автомобилот „фиат“ и неговата сопруга, Б.П. (32), додека нивниот седумгодишен син е повреден и во критична состојба е префрлен на скопските клиники. Повредена е и сопатничката во „аудито“, германска државјанка, која со потешки повреди е задржана во Општата болница во Велес“, стои во соопштението на Обвинителството.
Надлежен обвинител од Јавното обвинителство во Гевгелија, извршил увид на местото и се работи на утврдување на околностите под кои се случила сообраќајката.
„Возачот на „аудито“, државјанин на Република Србија, е задржан. Надлежен јавен обвинител веднаш издаде наредба за обдукција на телата на починатите лица, како и наредба за технички преглед на автомобилот „aуди“ и на автобусот. Истовремено, земени се примероци од крв и од урина на возачите, кои се ќе анализираат. Дополнително, се вршат разговори со сите инволвирани, со патниците од автобусот, како и со возачи-очевидци на сообраќајната несреќа“, велат од Обвинителството.