Бројот на загинатите во катастрофалниот земјотрес, кој во саботата вечерта го погоди Еквадор, се зголеми на 570 лица, а новиот потрес им ја отежна потрагата на спасувачките екипи по преживеани, соопшти еквадорскиот претседател Рафаел Кореа.
Тој додаде дека досега се идентификувани 526 лица, а уште 163 се водат како исчезнати. Повредени се 7.015 лица, а бројот на настраданите веројатно ќе се зголемува.
Земјотреси од 6,1 и 6,3 степени според Рихтеровата скала се случија четири дена по катастрофалниот земјотрес со јачина од 7,8 степени според Рихтеровата скала, кој го опустоши пацифичкиот брег на Еквадор.
– Се почувствуваа два потреса во временска разлика од неколку секунди – рече директорот на Геофизичкиот институт на Еквадор, Марио Руис.
Од саботата се забележани повеќе од 500 нови потреси, кои може да потраат повеќе дена и ја отежнуваат работата на спасувачите.
Новите потреси ноќеска предизвикале паника меѓу спасувачите и граѓаните, но не предизвикаа штета.
Повеќе од 900 спасувачи, пожарникари и лекари од 20 земји интензивно трагаат по преживеани.
Кореа предложи формирање единствен орган за следење природни катастрофи на ниво на цела Латинска Америка.
Земјотресот во Еквадор е најразорниот во Латинска Америка од 2010 година, кога во катастрофалниот потрес на Хаити загинаа меѓу 200.000 и 250.000 лица.
Епицентарот бил на 27 километри југоисточно од Муисне, слабо населено подрачје кое е популарно меѓу туристите.