Министерството за здравство ја информира јавноста дека денеска при анализа на податоци од позитивни ковид пациенти во месец јануари, во приватна лабораторија за генетика и персонализирана медицина на клиниката Жан Митрев, кај еден примерок е детектирана мутација на британскиот сој на вирусот СарсКоВ 2. Станува збор за 46-годишен маж кој веќе е оздравен, односно во базата на податоци на Инстистутот за јавно здравје пациентот од 22 јануари 2021 се води како оздравен.
Според информациите од ИЈЗ, пациентот првпат на 29 декември 2020 година, поради покачена температура и отежнато дишење, прави брз тест. Тестот е со позитивен резултат. По неколку дена, односно на 4 јануари 2021 година се јавува на преглед во приватната болница Жан Митрев каде му е направен ПЦР тест кој е позитивен, а пациентот е веднаш хоспитализиран во приватната болница. На 15 јануари во болницата му е направен уште еден тест кој повторно е позитивен.
Во епидемиолошката анкета пациетот нема пријавено контакти ниту пак навел дека патувал надвор од државата.
Лабараторијата во болницата Жан Митрев со посебна ПЦР метода е утврдено дека пациентот е суспектен на некоја мутација на вирусот, а потоа е направено секвенционирање на изолатот. Според информацијата која ја проследија до МЗ, сите мутации кои го дефинираат британскиот сој се утврдени кај изолатот од овој пациент. Кај останатите примероци кои се анализирани во приватната лабараторија не е детектиран британскиот сој на СарсКоВ2, информираат од Министерството за здравство.
Инаку, новата мутација на корона вирусот беше откриена во Велика Британија, а првото детално истражување е завршено на 11 декември 2020 година. Веќе до средината на овој месец, Светската здравствена организација (СЗО) потврди дека британскиот сој на корона вирусот е откриен во 50 земји. Од СЗО тогаш напоменаа и дека следењето на контактите кај заболените лица од британскиот сој открило дека новата мутација на вирусот е позаразна. Покрај британскиот сој, нови варијанти на корона вирусот се и јужноафриканскиот сој откриен во барем 20 држави во светот, како и бразилскиот сој.
