Македонското друштво „Илинден“ од Тирана, одбележувајќи ја седумгодишнината од основањето, додели седум благодарници на истакнати претставници и на асоцијации од Албанија и од Македонија.
Меѓу другите, благодарници им се доделени на здружението „Илинденски марш – Христо Узунов“ од Охрид, на бизнисменот Ѓорѓија Џорџ Атанасоски и на Васил Дрвошанов, лингвист, критичар и поет од Скопје.
– Благодарницата се дава на лица за нивните особени заслуги за научниот и за стручниот ангажман и за перманентните активности во насока на зачувување и на одржување на македонскиот идентитет на припадниците на македонското национално малцинство во Албанија – вели претседателот на друштвото „Илинден“ од Тирана, Никола Ѓурѓај.