Спомен-бистата на народниот херој Ванчо Прке во центарот на Штип е осквернавена со кукаст крст, којшто е исцртан на неговата глава. Екипа на Мета.мк викендов беше во Штип и го забележа вандалскиот чин врз спомен-бистата, која е лоцирана пред зградата на Домот на културата „Ацо Шопов“ во Штип и на помалку од стотина метри од Споменикот на депортираните Евреи од Штип.
Мета.мк забележа дека спомен-бистата на Ванчо Прке е осквернавена со црн маркер, а покрај кукастиот крст ишарани се и други делови од главата на споменичното здание.
Од Општина Штип за Мета.мк велат дека го регистрирале конкретниот случај на вандализам во делот Алејата на народните херои, конкретно спомен-бистата на Ванчо Прке, при што е констатирано оштетување со графит црн фломастер во два потега, и тоа на левата страна на вратот и на десната половина од усните на бистата – шкртаница во форма на мустаќ.
Инаку, согласно Законот за меморијални споменици и спомен обележја, спомен обележјата се во надлежност на општините. Општина Штип во рамките на своите надлежности има донесено Програма за одбележување на значајни настани и личности за периодот 2023-2027 година, во чии рамки е опфатена грижата и одржувањето на спомен обележјата. Во овој документ, општината ја презела обврската на годишно ниво да прави увид на сите спомен обележја според Регистерот, со утврдување на моменталната состојба и степенот на евентуалната оштетеност на спомен обележјето. Спомениците се фотографирани и имаат детален опис вграден во единствен документ, во кој е наведен и предлог за приоритет во санацијата што се носи со конкретна одлука на советот за реагирање по одлуката.
Инаку, Ванчо Прке бил еден од организаторите на Народно-ослободителната борба во Штип за време на Втората светска војна. Бил убиен од припадници на фашистичката власт на 21 мај 1943 година. Тој бил прогласен за народен херој на Југославија на 2 август 1949 година.
Покрај неговата биста, во центарот на Штип се наоѓаат и споменици на народните херои Љупчо Арсов, Михаил Апостолски и Славчо Стојменски. Во непосредна близина на овие спомен-бисти, се наоѓа Споменикот на депортираните Евреи што е подигнат во чест на депортираните Евреи од Штип за време на Втората светска војна.
